Збирката ја сочинуваат вкупно 4.800 инвентарирани единици, од кои поголемиот дел се фототечен материјал. Низ фотографиите се застапени сите модерни спортови во Македонија, како и почетоците на разни гимнастички друштва во почетокот на ХХ век, во лицето на организацијата Јунак и Сокол.

Од тој период се зачувани неколку интересни предмети: значки од одржаните слетови на соколските организации, фудбалски чевли со кои се служел Ѓорѓи Клинчаров од Велес во 30-те години на ХХ век, како и скии користени од Петар Сарев од Штип.

Од современите спортови направени се неколку фондови, по пат на подарок или откуп:

Фонд на Мемо Сулејманов, првиот македонски маратонец, во кој се вклучени дипломи, благодарници, пофалници, како и освоените 13 медели, 2 пехари и 3 ордени;

Фонд на Љубиша Трбоевски, атлетичар, во кој влегуваат плакети, дипломи, пофалници, 11 медали, 5 пехари и 1 орден;

Фонд на Васил Франговски, алпинист, кој е застапен со 66 инвентарни единици, главно алпинистчка опрема;

Фонд на Фарук Радончиќ, кајакар, составен од многубројни признанија, пофалници, благодарници, дипломи, освоени 45 медали на разни меѓународни и домашни натпревари, како и дел од неговата спортска опрема;

Фонд на Олимпискиот плакат, кој се состои од 38 официјални постери на одржаните Летни и Зимски олимписки игри.

Драган Георгиев, виш кустос

фотогалерија